Kreisposaunenfest 2022

Endlich wiehe Kräisposaunenfest!

Läiwe Gemäinde,

woh lange häbt wie doh up tofft, owe nu wöh ät sou wiet, an twelften (12ten) Juni häbt wie in use Kiärkengemäinde wie Kräisposaunenfest fiet. Bien lästen mol kaimp däi graute Trop van Posaunenbliäsers in Odenshost up`n Gutshuorwe tohaupe. Daumols – doh kühde no käiner vann Corona – wöhn woll 160 Bliärser doh, wat vo äin imposanted Bällt. Un dann däi Moment ols olle anföngen tou spierln, ick kriege hüte no ne Gausehut, wenn ick doh andenke. Dat wöh owe auk dütmol nich änners, ols nu man sick güst 60 Bliärser inne Bost schmeiden – däi spierlden güst sou gout un helle! Dat äinzich ännere an düssen Dach wö, dat dat Ganze nu in Stiepe-Ölnge bie use nigge Gemäinschaftshalle stattfönd. Richtich schick isset doh wohden.

Dat dat Fest ürwehaupt toustanne gurm is, häbt wie auk dütmol Schnieders Jörn tou vodanken. Ols bekannt wöh dat däi Posaunenchor ut Melle-Oldenduorp dat Fest nich utrichten konn, siär häi sick „Dänn no äinmol bi us!“ – dat was in Februar un bät Juni wöt nich mäh lange hänn. Owe häi kraich dat hänn – butz dänn Pastoo beschäit säggen un Kräiskantor Andreas Opp anrouben, däi scholl jä wiehe dänn Chor deregehden. Un nu mann düchtich üben, mät dänn äigenen Chor. Tüsken in no passende Läider utseuken un Läiderzirdel utdrucken, däi Lüe scholln jä onnik mätsingen. Bät toun lästen Dach susede häi van äin toun ännern, bäd dänn ollens praut stönnt. Owe ät häf sick auk dütmol wiehe lohnt, dänn ändlich konn man däi Posaunen wieh live beliewen. Ols dank gaif ät vo Jörn äine Rousen van usen Pastoo un düchtigen Applaus van däi Gemäinde. Auk use nigge Supprendent Joachim Cierpka spurde nich mät lobende Wöre.

Vo olle däi nich dobie sien konnen kann ick säggen: „Gieh häbt wat vopasst.“ Owe nich schlimm, dat schönste Stücke van düssen Vomdach kürnt gie nomol toulustern wänn gie mät jun Schmartfon dänn QR-Code affotografeht – lägget ju owe auk äin Taskendouk praut, ät kann sien dat däi äin orre ännere doch ne Traun vodrücken mot – ick sägge blautz „Gabriellas-Song“

Bät up`n ännermol, jue Plattdüske.

Oelschliers Jürgen